ខេត្តកំពង់ធំ វិធានការរបស់រដ្ឋាភិបាល ដែលបានដាក់ចេញ កាលពីថ្ងៃទី១៥ ខែមករា ឆ្នាំ២០១៦ ក្នុងការ ទប់ស្កាត់ និងបង្ក្រាបបទល្មើសព្រៃឈើ និងការរត់ពន្ធឈើ ឆ្លងដែនចូលទៅប្រទេសវៀតណាម ដោយខុសច្បាប់នោះ ត្រូវបានមជ្ឈដ្ឋាន នានាវាយតម្លៃថា អយុត្តិធម៌ណាស់ ចំពោះសម្ដេចអគ្គមហា សេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណា ចក្រកម្ពុជា ដ៏ខ្ពង់ខ្ពស់ ព្រោះពួកមេក្លោង និងពួកមន្ត្រីខិលខូច ដែលបានឃុបឃិតគ្នានោះ ពុំបានទទួលទោស ទណ្ឌ ឱ្យបានសមរម្យ ទៅតាមផ្លូវច្បាប់នោះទេ ចំណុចអវិជ្ជមានអស់ទាំងនេះ ហើយ ដែលធ្វើឱ្យ ប្រជាពលរដ្ឋអស់សង្ឃឹម ជំនឿទៅលើគណបក្ស ប្រជាជនកម្ពុជានោះ ជាពិសេស គណបក្សប្រឆាំង តែងតែឆ្លៀតឱកាស យកចំណុចខ្វះចន្លោះនេះ មករិះគន់ចំៗ ចំណុចខ្លាំងៗថា គណបក្សប្រជាជនកម្ពុជា អសមត្ថភាព ក្នុងការដឹកនាំ បានបណ្ដែត បណ្ដោយឱ្យ ពួកមេឈ្មួញ និងមន្ត្រីខិលខូច ដែលជាជនឆ្លៀតឱកាសនិយម ឃុបឃិតគ្នាប្រព្រឹត្តិបទល្មើស ធនធានធម្មជាតិ គ្រប់បែបយ៉ាង ជាពិសេសការកាប់បំផ្លាញព្រៃឈើ ការរុករាន ទន្រ្ទានយកដីព្រៃរបស់រដ្ឋ ការចរាចរឈើ ការរត់ពន្ធឈើ ឆ្លងដែនដោយខុសច្បាប់ នាពេលកន្លងមកបានរួចខ្លួនរស់ នៅក្រៅសំណាញ់ច្បាប់ យ៉ាងរំភើយ។
ជាក់ស្តែង កាលពីរសៀលថ្ងៃទី១៣ ខែឧសភា ២០១៧នេះ មានរថយន្តហ៊ីយ៉ាន់ដាយ ដឹកឈើធ្នង់ខុស ច្បាប់ចំនួន៧៤ដុំ ដែលមានម្ចាស់ ឈ្មោះ ធា ភេទប្រុស អាយុ២៦ឆ្នាំ រស់នៅភូមិព្រែកតាមាក់ ត្រូវបានមន្ត្រីរដ្ឋបាលព្រៃឈើ កំពង់ថ្ម សហការជាមួយ កម្លាំងកងរាជអាវុធហត្ថ ស្រុកសន្ទុក ស្ទាក់ចាប់បានរថយន្តម៉ាក់ ហ៊ីយ៉ាន់ដាយ ដឹកឈើធ្នង់ ៧៤ដុំនោះ នៅចំណុចភូមិវាំងត្បូង ឃុំតាំងក្រសាំង ស្រុកសន្ទុក ខេត្តកំពង់ធំ ខណៈពេលរថយន្ត កំពុងដឹកឈើចេញពី ទីរួមខេត្តកំពង់ធំ។
ក្នុងនោះលោក ស្រី សំណាង មេបញ្ជាការ កងរាជអាវុធហត្ថស្រុកសន្ទុក បានអោយដឹងថា ៖ បន្ទាប់ពីបានទទួលព័ត៏មាន ពីភ្នាក់ងារភ្លាម លោកបានបញ្ជារអោយកំម្លាំងអាវុធហត្ថសហការ និងរដ្ឋបាលព្រៃឈើ បានត្រៀមកម្លាំង ចាំស្ទាក់ចាប់ លុះមួយសន្ទុះក្រោយមក ក៏បានប្រទះឃើញ រថយន្តនោះគួរឱ្យសង្ស័យ ធ្វើដំណើរចេញមក ពីខេត្តកំពង់ធំ ខណៈពេលនោះ កម្លាំងសមត្ថកិច្ចចម្រុះ យើង បានស្ទាក់ឃាត់សួរនាំ ទៅឃើញដឹកឈើ ពេញប្រៀប ហើយគ្មានច្បាប់ ក៏បាននាំយករថយន្តដឹក ឈើគ្មានច្បាប់នោះ ប្រគល់ទៅអោយជំនាញផ្នែករដ្ឋបាលព្រៃឈើកំពង់ថ្ម ព្រមទាំងបានឃាត់ខ្លួ នអ្នកបើកបរ និងអ្នករួមដំណើរចំនួន២នាក់ ស្រីមួយនាក់ ប្រុសម្នាក់់ យកទៅសួរនាំ នៅទីស្នាក់ការ ផ្នែករដ្ឋបាលព្រៃឈើ កំពង់ថ្ម ដើម្បីសួរនាំធ្វើកំណត់ហេតុ កសាងសំណុំរឿង បញ្ជូនបន្ត ទៅសាលាដំបូងខេត្តកំពង់ធំ ចាត់ការឱ្យបានធ្ងន់ធ្ងរ ទៅតាមនីតិវិធី នៃច្បាប់
លោកសុទ្ធ ម៉ារី នាយផ្នែករដ្ឋបាល ព្រៃឈើកំពងថ្ម បានអោយដឹងថា៖ឈើដែលផ្ទុកនៅលើរថយន្តម៉ាកហ៊ីយ៉ាន់ដាយនោះមានចំនួន ៧៤ដុំស្មើរនិង ១៣,៧១ម៉ែត្រគូប ជាប្រភេទឈើប្រណិត {ធ្នង់}។ ជាក់ស្ដែង វត្ថុតាង ត្រូវបានរឹបអូសយកមករក្សារទុក នៅទីស្នាក់ការ ផ្នែករដ្ឋបាលព្រៃឈើកំពង់ថ្ម រីឯ ចំណែកអ្នកបើកបរ រថយន្ត និងអ្នករួមដំណើរត្រូវ បានកសាងសុំណុំរឿង បញ្ជូនបន្តទៅថ្នាក់លើ ដើម្បីចាត់វិធានការតាម ផ្លូវច្បាប់ជាធរមាន៕
